हार्दिक शुभकामना ।

आदरणीय आमा-बुबा¸ दाजु-भाइ तथा दिदी-बहिनीहरु,

नववर्ष २०७७ को उपलक्ष्यमा देश विदेशमा रहनुभएका सम्पूर्ण आमा-बुबा¸ दिदीबहिनी तथा दाजुभाइहरुमा सुख, शान्ति, समृद्धि, सुस्वास्थ्य एवं दीर्घायुको हार्दिक मंगलमय शुभकामना व्यक्त गर्दछु ।

नयाँ वर्ष २०७७ प्रवेशको अवसरलाई अत्यन्त उल्लास र उमङ्ग साथ मनाउने हाम्रो चाहना विश्वव्यापी रुपमा फैलिरहेको कोरोना (कोभिड १९) को महामारीका कारण सहज हुन सकिरहेको छैन । यस कठीन घडीमा यसको संक्रमणबाट आफुसँगै अरुलाई जोगाउन आवश्यक उपाय अपनाउन सबैले आ-आफ्नो स्थानबाट पूर्‍याउनु भएको योगादानको उच्च सम्मान गर्दै यसको अझ बढोत्तरी सहित निरन्तरताका निम्ति समेत हार्दिक अनुरोध गर्दछु ।

समृद्ध नेपाल र सुखी नेपालीको राष्ट्रिय लक्ष्य हासिल गर्ने महत्वपूर्ण र जिम्मेवार तहमा हामी स्थानीय तहहरु नै रहेको हामीलाई बोध छ । प्रत्येक नागरिकका दैनिक समस्याहरुसँग जुध्न आम नागरिककै माझमा रही सबैको साथ सहयोग र सहकार्यमा कामगर्ने जिम्मेवारी पनि हाम्रै हो । स्वस्थ्य, सन्तुष्ट र हरेक हिसाबले सशक्त नागरिक नै समृद्ध राष्ट्रका मानक हुन् भन्ने कुरा हामीले बुझेका
छौं ।

अहिले विश्वव्यापी रुपमा फैलिएको कोरोना (कोभिड १९) महामारीले ल्याएको यस सङ्कटको घडीमा जनताको घर आँगनमै पुगेर सेवा पुर्‍याउन हाम्रा प्रयासहरु कमजोर नहोउन भन्ने तर्फ हामी अत्यन्त जिम्मेवार ढंगले लागिरहेका छौं । आईपर्ने समस्याको समाधानमा पनि हामी सबै एकआपसमा मिलेर गर्नुपर्छ र यो गरिरहेका पनि छौं ।

अहिले हामी अत्यन्तै कठीन अवस्थाबाट गुज्रिरहेका छौं । हाम्रा जीवन निर्वाह र बृत्तिविकासका लागि जारी क्रियाकलापको निरन्तरतामा अवरोध आएको छ । यस अवस्थामा असङ्गठित क्षेत्रमा कार्यरत श्रमिक वर्ग तथा असहायहरुलाई यस अवधिमा हाम्रा प्राथमिक राहतबाट वञ्चित हुनु नपरोस् भनी हाम्रा सबै जनप्रतिनिधि, राष्ट्रसेवक कर्मचारीहरु अहोरात्र खटिरहनुभएको छ । साधन र श्रोतले भ्याएसम्म हाम्रा सबै प्रयासहरु आम जनसमुदायकै सहज जीवनयापनका लागि केन्द्रीत रहेको विश्वास दिलाउन चाहन्छु ।

यस संकटको घडीमा हामीलाई हर तवरबाट सहयोग गर्नुका साथै स्थानीय प्रकोप राहत कोषमा सहयोग गर्नु हुने तथा सहयोग गर्न चाहनेहरु सम्पूर्णमा हार्दिक कृतज्ञता ज्ञापन गर्दछु ।

हामीले बेलैमा अपनाएको सावधानी र आम जनसमुदायको साथ र सहयोगले हालसम्म हामी सुरक्षित छौं । तरपनि कतिबेला कुन परिस्थिति आउने हो, अझै निश्चित छैन । यस महामारीको निर्मुलिकरणका लागि भईरहेका संसारभरका प्रयासहरु त्यति कामयाव हुन सकिरहेका छैनन् । यसले आगामी दिन थप चुनौतीपूर्ण हुन पनि सक्दछन् । हामी यसको सामनाका लागि तयारी अवस्थामा रहनु
पर्दछ । हाललाई हामीले अपनाएको स्वयं पृथकीकरण तथा बन्दाबन्दी (Self Isolation & Lockdown) को हुवहु परिपालनका निम्ति हार्दिक अनुरोध गर्दछु ।

यस महामारीको चपेटामा रहिरहंदा यसको रोकथामका उपायहरुको अवलम्बनसंगै यसले ल्याउने अन्य थप प्रभाव र चुनौतीलाई सामना गर्ने तयारी किन्चित ढिलो नगरी आजैदेखि गर्नु पर्दछ । सिंगो राष्ट्र सहित हाम्रो छत्रदेव गाउँपालिकालाई कम्तीमा पनि आधारभूत रुपमा आत्मनिर्भर बनाउने तर्फ हाम्रो ध्यान जाने छ । यस महान कार्यमा विगतमा जस्तै साथ, सहयोग र ऐक्यवद्धताको अपेक्षा गरेका छौं ।

अन्त्यमा, सबैको सुख, शान्ति, समृद्धी¸ सुस्वास्थ्य र सन्तुष्टीको कामनासहित हामीलाई परेको यस संकटसँग जुध्ने शक्ति हामीमा रहिरहोस्¸ नयाँ बर्ष २०७७ को हार्दिक शुभकामना । धन्यवाद । जय छत्रदेव !

मितिः २०७७/०१/०१ गते                                                                                                

लेखनाथ पोख्रेल

अध्यक्ष

छत्रदेव गाउँपालिका